Tune - "I had a horse."
I.
O poortith cauld, and restless love,
Ye wreck my peace between ye;
Yet poortith a' I could forgive,
An' twere na' for my Jeanie.
O why should fate sic pleasure have,
Life's dearest bands untwining?
Or why sae sweet a flower as love
Depend on fortune's shining?
II.
This warld's wealth when I think on,
It's pride, and a' the lave o't
Fie, fie on silly coward man,
That he should be the slave o't!
III.
Her een sae bonnie blue betray
How she repays my passion;
But prudence is her o'erword ay,
She talks of rank and fashion.
IV.
O wha can prudence think upon,
And sic a lassie by him?
O wha can prudence think upon,
And sae in love as I am?
V.
How blest the humble cotter's fate![1]
He wooes his simple dearie;
The silly bogles, wealth and state,
Can never make them eerie.
O why should Fate sic pleasure have,
Life's dearest bands untwining?
Or why sae sweet a flower as love
Depend on Fortune's shining?