I hae laid a herring in saut,
Lass, gin ye lo'e me, tell me now;
I hae brew'd a forpit o' maut,
And I canna come ilka day to woo:
I hae a calf that will soon be a cow,
Lass, gin ye lo'e me, tell me now;
I hae a stook, and I'll soon hae a mowe,
And I canna come ilka day to woo:
I hae a house upon yon moor,
Lass, gin ye lo'e me, tell me now;
Three sparrows may dance upon the floor,
And I canna come ilka day to woo:
I hae a but, and I hae a ben,
Lass, gin ye lo'e me, tell me now;
A penny to keep, and a penny to spen',
And I canna come ilka day to woo:
I hae a hen wi' a happitie leg,
Lass, gin ye lo'e me, tell me now;
That ilka day lays me an egg,
And I canna come ilka day to woo:
I hae a cheese upon my skelf,
Lass, gin ye lo'e me, tell me now;
And soon wi' mites 'twill rin itself,
And I canna come ilka day to woo.