Tune - "Tam Glen."
I.
My heart is a-breaking, dear Tittie!
Some counsel unto me come len',
To anger them a' is a pity,
But what will I do wi' Tam Glen?
II.
I'm thinking wi' sic a braw fellow,
In poortith I might make a fen';
What care I in riches to wallow,
If I maunna marry Tam Glen?
III.
There's Lowrie the laird o' Dumeller,
"Gude day to you, brute!" he comes ben:
He brags and he blaws o' his siller,
But when will he dance like Tam Glen?
IV.
My minnie does constantly deave me,
And bids me beware o' young men;
They flatter, she says, to deceive me,
But wha can think so o' Tam Glen?
V.
My daddie says, gin I'll forsake him,
He'll gie me guid hunder marks ten:
But, if it's ordain'd I maun take him,
O wha will I get but Tam Glen?
VI.
Yestreen at the Valentine's dealing,
My heart to my mou' gied a sten;
For thrice I drew ane without failing,
And thrice it was written, Tam Glen.
VII.
The last Halloween I was waukin
My droukit sark-sleeve, as ye ken;
His likeness cam up the house staukin,
And the very grey breeks o' Tam Glen!
VIII.
Come counsel, dear Tittie! don't tarry
I'll gie you my bonnie black hen,
Gif ye will advise me to marry
The lad that I lo'e dearly, Tam Glen.