Tune - "Had I the wyte she bade me."
I.
Had I the wyte, had I the wyte,
Had I the wyte she bade me;
She watch'd me by the hie-gate side.
And up the loan she shaw'd me;
And when I wadna venture in,
A coward loon she ca'd me;
Had kirk and state been in the gate,
I lighted when she bade me.
II.
Sae craftilie she took me ben,
And bade me make nae clatter;
"For our ramgunshoch glum gudeman
Is out and owre the water:"
Whae'er shall say I wanted grace
When I did kiss and dawte her,
Let him be planted in my place,
Syne say I was the fautor.
III.
Could I for shame, could I for shame,
Could I for shame refused her?
And wadna manhood been to blame,
Had I unkindly used her?
He claw'd her wi' the ripplin-kame,
And blue and bluidy bruised her;
When sic a husband was frae hame,
What wife but had excused her?
IV.
I dighted ay her een sae blue,
And bann'd the cruel randy;
And weel I wat her willing mou',
Was e'en like sugar-candy.
A gloamin-shot it was I wot,
I lighted on the Monday;
But I cam through the Tysday's dew,
To wanton Willie's brandy.