Lord Advocate.
He clench'd his pamphlets in his fist,
He quoted and he hinted,
'Till in a declamation-mist
His argument he tint it:
He gaped for't, he grap'd for't,
He fand it was awa, man;
But what his common sense came short
He eked out wi' law, man.
Mr. Erskine.
Collected Harry stood awee,
Then open'd out his arm, man:
His lordship sat wi' rueful e'e,
And ey'd the gathering storm, man;
Like wind-driv'n hail it did assail,
Or torrents owre a linn, man;
The Bench sae wise lift up their eyes,
Half-wauken'd wi' the din, man.